1 Дила урши! Хъуммартид дила насихӀятуни, дила хъарбаркьуни хӀела уркӀилар калаб, 2 илдани хӀела гӀямрула бурхӀнира дусмира духъяндилтӀахъу, ва хӀед саламатдеш лебху.
3 Дигилира мардешлира хӀу вархьматаби: илди хӀуни хъяб-алав дигьен ва хӀела уркӀилизи делкӀен. 4 ИлхӀели Аллагьла ва адамтала гьалар гӀяхӀси хӀерра уркӀиаргъибдешра дургид.
5 УркӀи-уркӀилавад ХалавегӀилличи вирхен, хӀела дагьриличи хъармайхъудну, 6 лерилра хӀела гьундурачив Ил вален, Илини хӀу вашути дукьби дархьдиру.
7 ХӀед хӀуни пасихӀсила мадирид, ХалавегӀиллизивад урухкӀен ва вайсиличивад гьарахъиркен. 8 Илини хӀела чарх сагъбирахъу, илини хӀела лигубира чӀумадирахъу.
9 ХӀела лебдешлизибад ва хӀела лебилра сабухъла цаибти цӀедешлизибадb ХалавегӀилла хӀурматбирен. 10 ИлхӀели хӀела усурби дицӀили дирар, тӀутӀидялч сагати чягъирли чяхӀбикӀар.
11 Дила урши, ХалавегӀилла бяркълизивад гӀелуммалзад, Илини уркъбяхъибхӀелира гьиммаркӀуд, 12 сенкӀун ХалавегӀилли сунес дигахъуси сай танбихӀлаируси, Ил сунела дурхӀялис дудешливан илис гӀяхӀбулгули вирар.
13 ТалихӀкар сай пасихӀдеш даргибси ва дагьриличи вегӀиубси адам, 14 сенкӀун пасихӀдешличи вегӀиъни цӀуб арц тӀалабдарниличиб къулайси саби, ва иличибли сархуси хайри мургьилайчиб халаси саби. 15 Илди дурхъати къаркъубачирра кьиматчерти сари, ва хӀед диубли дигути секӀайзибад селра пасихӀдешличил цугбикес хӀебирар. 16 Илала балуй някълизир духъянти гӀямру сари, алгъай някълизир биалли – давла ва асилдеш. 17 Илдала гьундури – разити гьундури сари, лерилра илдала дукьби баракатла дирар. 18 ПасихӀдеш – сари тӀалабдирутас гӀямрула галга сари, ва талихӀчебти саби илди чӀумали дуцибти.
19 ХалавегӀилли пасихӀдешличил ванза кабизахъур, дагьриличил зубрира дебадариб. 20 Илала балудешли лутӀи агар мурхьдешла урунжуни гьаргдиахъуб, ва гъагулти аръа маркали кӀантӀдикӀандариб.
21 Дила урши! Илди хӀела хӀулбаурад урмадулхъахъид, гӀякьлукардеш ва пикрикардеш дихӀен, 22 илди хӀела рухӀлис гӀямрули ва хӀела хъяблис баракатла бакили дирар. 23 ИлхӀели хӀела гьуникад урехиагарли вашуд, ва хӀела кьяш къардхӀебулхъан. 24 Усес кайхьунхӀелира – урухкӀули хӀейруд, усаунхӀелира – хӀела гьанкӀ тӀягӀямла бирар.
25 Хабарагарли бакӀибси балагьлизивад, гьимикартала шайзирадти харабдешуназивад урухмакӀуд, 26 сенкӀун ХалавегӀил хӀед къакъбяхъли вирар, ва хӀела кьяшми Илини тӀимкьлизирад уцахъу.
27 ХӀела някъбазиб гӀяхӀбаркь барес цӀакь лебхӀели, хӀяжатдеш лебсилис ил барес гӀелуммалзад. 28 ХӀела гьалмагълизи майкӀуд: «Кьанниван вакӀи, нуни хӀед жягӀял лугасну, гьанна укьен ва жягӀял вакӀи», Илини бихабарибси беда, хӀела лебли биалли.
29 ХӀела гъамсилис вай барес кьасмабирид, ил хӀела мякьлав урехи агарли хӀерирули сай. 30 Сабаб агарли адамличил къалмакъарли маркьуд, хӀед илини вайси барили хӀейалли.
31 Кьяркьдеш дакӀудирусиличи кьясмайруд ва илала гьундуразибад хӀуни цалра чебмабиркӀид, 32 сенкӀун ХалавегӀиллис макрукья жяргаси сай, бархьтачи саби Илини бирхауди бирхьуси.
33 ХалавегӀилли гьимичевсила юртличи лягӀнатбуршу хӀялалтала хъалицӀализи биалли Илини баракат кабирхьу. 34 ЧебдукаркӀутачив Ил дукаркӀар, Сунес бушинтас ряхӀму биру.
35 ПасихӀтас асилдеш букьурлидиур, ахмахунас усалдеш гӀердиур.
