Даргала халкь – Дагъиста жявхӀелла халкьаназибад цабехӀ саби. Даргантала мер-муса дубуртар улкала байлизир сари.
1928-ибил дусличи бикайчи даргантани, Дагъиста цархӀилти халкьанани кьяйдали, Дагъиста мезанала хасдешуначи балбушибси гӀярабла графикаличи хъарахъили акӀахъубси миллатла белкӀ пайдалабирусири. 1928-ибил дусличибад латинна хьулчиличибси ва 1938-ибил дусличибад – урусла графикала хьулчиличибси белкӀ пайдалабирули саби.
Совет хӀукуматла дусмазир даргала литературала мез миллатла культурализир лебтасалра ца журали детаур. Гьанна школабазиб бехӀбихьудла классуназиб дурхӀни дарган мезли бучӀахъули саби, даргала литературала мез белчӀудила дурсри сарливан чедирти классуназир ва вузаназир руркъяхъули сари, илди театртала сценабачирад, радиолизирад ва телевидениелизирад зайдикӀули сари. Дарган мезли 6 районна ва 1 республикала газетаби, 2 журнал дурадулхъули сари. Дагъиста жузала издательстволи гьар дуслизир дарган мезли вецӀани автортала ва шурдатурти жузи дуракайули сари. Дагъиста цархӀилти миллатунала мезанани кьяйдали, дарган мезлира гьаладяхӀ дашес ва чеахъдикӀес гьарзати имканти касиб, белкӀ ва литературала мез гьаладяхӀ дашни халкь рухӀлашал чеахъбирнилис цӀакьси гьаликӀли детаур.
