Ца адамли халаси сяхӀбат бариб ва бахъал гӀяхӀли жибариб. СяхӀбатла замана баибхӀели, сунела къараваш вархьили сай, жибарибтази бурахъес: «Гьар секӀал хӀядурлину, даширая». Жибирути цалис гӀергъи ца чердерхира бикӀескабииб. Цаибилли иб: «Нуни хъу асилра, ил чебаэс укьес гӀягӀнили саби. Чевверхи набчивад». КӀиибилли иб: «Нуни шудехӀ унци асили, илди халдарес гӀягӀнили сари. Чевверхи набчивад». ХӀябэсиллира иб: «Ну хъайчикайилра, ну вакӀес хӀейрус».
Къаравашли, чариубли вакӀили, иличила хужаимлизи буриб. ИлхӀели гӀясииубси хужаимли сунела къаравашлизи иб: «Къалабали шагьарлизи укьен, лерилра гьундурикад ва кьакьурбикад алавиубли, лебил мискинтира, чулахъунира, сукъуртира, гӀяргабира бучили, иша ка». Къаравашли илизи иб: «Хужаим, хӀуни хъарбарибси нуни барира, амма акьути мерани гӀурра лерал». ИлхӀели хужаимли къаравашлизи иб: «Гьундурикад ва хӀярурбикад укьенну, лебилра къаршибикибти сяхӀбатличи бакӀахъес гӀяхӀил тиладибара. Наб гӀяхӀлани хъали бицӀахъес дигулра». ХӀушази бурулра: жибарили хӀебакӀибтазивад чилра дила сяхӀбатличив хӀевкан!»
