1 Дила урши, хӀуни дила гъай кьабулдарадли ва дила хъарбаркьуни хӀезир дихӀядли, 2 хӀела лихӀи пасихӀдешличи лехӀахъахъили ва хӀела уркӀи иргъниличи бяхӀчиаадли, 3 ва дагьри жидирадли, ва аргъни ахъли тиладибирадли, 4 ил баргес цӀуб арц даргесван умцӀадли ва дигӀянбарибси давла баргесван умцӀадли, 5 илхӀели хӀуни иргъид Раббизибадси урехи ва хӀуни Аллагь валад. 6 СенкӀун Раббини саби пасихӀдеш лугуси, ва Илала мухӀлилизирад сари багьудира иргънира. 7 Ил хӀялалтас берцуди сай, кабизалачебли хӀербирутас Ил къакъбяхъ сай. 8 Илини бархьдешла дякь бихӀули сай, ва Сунес мартала гьуни балтахъули сай.
9 ИлхӀели хӀуни иргъид се сарил хӀялалдеш, бархьдеш ва уркӀила умудеш – гӀяхӀличи аркьуси гьарил гьуни. 10 СенкӀун хӀела уркӀилизи пасихӀдеш абицӀур, ва багьуди хӀела рухӀлизиб гӀяхӀсили бирар. 11 ПикриикӀес балнили хӀед къараулбиру ва иргънили вихӀури.
12 ПасихӀдешли хӀу вайдешла гьуйзивад вихӀури, макрула дугьбала бегӀтазивад валтахъари, 13 цӀябси дякьличибад башес бархьси гьуни балтутазивад пасихӀдешли хӀу уцахъури. 14 Вайси бирухӀелира саби разили бирутазивад ва вайдешла жяргадешличи разибирутазивад, 15 далкӀунти гьундурала бегӀтазивад ва чула дукьбачиб чеббулкӀутазивад пасихӀдешли хӀу уцахъури.
16 Илкьяйда хӀу урхӀла хьунуйзивад, лявдикӀути дугьбала регӀ къехӀба хьунуйзивад мяхӀкамирури, 17 суненира жагьхӀелла вархкья вархьватурли, Аллагьличил барибси вягӀда хъумартурси. 18 Илала юртли бебкӀаличи аркули сай ва илала гьундурани биалли – бебкӀибтала рухӀличи. 19 Иличи аркьутазивад я чилра чарулхъули ахӀен, ва гӀур гӀямрула гьуйчи дураулхъули ахӀен.
20 Илбагьандан хӀу гӀяхӀтала дякьличивад вашен ва хӀялалтала гьуни буца, 21 сенкӀун бархьти ванзаличиб хӀербирули кавлан, ва жагъалагарти иличиб хӀербирули кавлан. 22 Гьимичебти ванзаличибад агарбарили бирар, вершаби биалли иличиб мякьлизибад уббяхъили бирар.
