Бунагькартачил вархмаркуд
8 Дила урши, хӀела дудешла бяркъла гъайличи лехӀихъен ва хӀела нешла насихӀятуназивад гӀелуммалзад. 9 Илдала гъай хӀела бекӀлис пергер таж ва хъяблис баки сари. 10 Дила урши, эгер бунагькартани хӀу селичи-биалра гьирирахъули виадли, хӀу илдачи кьабулмаркуд. 11 Илди бикӀули биалли: «Ваши нушачил, хӀи картӀес укадиэс аркьехӀену, сабаб агаркъира сунечиб гӀяйиб агарси виркахъехӀену, 12 илди мицӀир-мицӀирли кьяриэхӀену, удунъялизи, цахӀнаб цӀяб хӀяблизи бурхьехӀену. 13 Гьар журала дурхъати секӀал хъям-кьацӀдирехӀе, нушала хъулри гъарала масли дирцӀахъехӀе. 14 «Нушачил барх чӀала игьа, цахӀнабси бирар нушала арцла тавра». 15 Дила урши, хӀу илдачил вархмаркуд, илдала гьуйчи катмалзад. 16 Илдала кьяшмикӀун вайбарес дуцӀли сари, илди хӀи картӀес гьалакбикӀули саби. 17 Лерилра арцанти хӀердикӀахъули илдас бул кадатни дугӀла саби, 18 илкьяйда бунагькартира чули саби заябарес укабирули саби! 19 Гъарала мас бикахъес гъаргъти лебталалра гьундурира илдигъунти сари. Гъарала масли ил бикахъибтала гӀямру керисули сари.
ПасихӀдешла жи
20 ПасихӀдешли кьакьурбазир тӀамадирули саби, илала тӀама майдунтачиб зайбикӀули саби, 21 тӀама-гьамали дицӀибти кьакьурбала хӀябкьяйтачиб ахъли жибикӀули саби, ва шагьарла къапулизивад ухӀналхъухӀелира ил гъайбикӀули саби: 22 «СецадхӀи кавлутираяв, дахъал хӀедагьурти, хӀуша селра хӀебалудеш дигахъули, инсапагарти – хӀяяагарли дукаркӀули, ахмахуни биалли – багьудиличи гьимичебли? 23 Шурдяхъирая дила уркъубяхъличи, хӀушаб пасихӀти пикруми гьаргдирисра ва хӀушази дила дугьби далахъисра. 24 Нуни, пасихӀдешли, жидарира, амма хӀуша шурхӀядяхъира; някъ гьабатурра – ил чебаэси атхӀехъиб. 25 ХӀуша лерилра дила насихӀятуназирад гӀелумдизуррая, нуни бурибси уркъубяхъ хӀушани кьабулхӀебарира. 26 Гьанна нура дукаркӀус, хӀуша балагьлизи дикибхӀели, ва кахдешли дуцибхӀели, – нура къугънабиркьус! 27 Ва кахдеш хӀушачибад шившитӀанван чедиберхурхӀели, ва балагьли бурямливан дяхъибхӀели, хӀуша децӀлира дардлира дячӀунхӀели. 28 ИлхӀели набзи, пасихӀдешлизи, жибикӀескабирар, амма нуни жаваб хӀелугас, ну баргес умцӀар, амма хӀебургура. 29 Илдани багьуди хӀейгибарни багьандан, ва Раббизибадси урехи уббатни багьандан, 30 дила маслигӀят кьабулхӀебарни багьандан, ва дила уркъубяхъ мучлахӀебарни багьандан, 31 илхӀели илди чула баркьудлумала цӀедешли букар, ва чула пикридарибтани лукъан, 32 сенкӀун дахъал хӀедагьуртикӀун чула чахусандешли кабуршу, ва ахмахуни чула авараагардешли къирбиру. 33 Амма набчи лехӀихъуси биалли, сегъуналра балагьлизивад урехи агарли, паргъатли, хӀерирар».
