Ца адамла кӀел урши лебри. Дудешлизи виштӀалли иб: «Дудеш, букьурла масла наб сабиркуси пай биха». Илини лебдеш кӀелра уршилис бутӀиб. Ца-кӀел бархӀила гӀергъи виштӀал урши, сунела лебси секӀал бучили, гьарахъ улкализи арякьун. Илав саяхъ гӀямрулизи ахъили, лебилра лебдеш харжбариб. Илини гьар секӀал харждарили тамандиубхӀели, ил улкализир цӀакьти гаши дехӀдихьили, ил агри-гашилизиикиб. ИлхӀели ил, илав хӀерируси минала ца адамличи узес арякьун. Илини ил сунела авлахъличи
цурми дихӀяхъес вархьиб. Ил илцадра гушлири, хӀятта цурмани дугути хъарала кьяртӀани деркес разилири, амма илдира илис дедлугули ахӀенри.
Аргъайчи вакӀили, илини иб: «Дила дудешличиб багьалис бузути бахъал хӀянчизартас, белкъра белкъи имцӀара бухъари, беркала камхӀебири, ну биалли ишав гаша убкӀулра. Арякьи, дудешлизи бурис: "Ну зубралара хӀелара гьалав бунагькар сайра. ХӀела урши сайра или викӀес ну лайикьли ахӀенрану, хӏела багьалис узуси хӏянчизаралра вараба"». Илмадан ил сунела дудешличи арякьун.
Ил гьарахъли левалли чеили, дудешла дебали уркӀецӀидухъун ва дуцӀли ветаили, хъябруцикили, уршиличи байикун. Уршили илизи иб: «Дудеш! Ну зубралара хӀелара гьалав бунагькар сайра. ХӀела урши сайра или викӀес ну лайикьли ахӀенра». Амма дудешли сунела къаравашунази иб: «Къалабали дукьенаяну, дегӀлара гӀяхӀти палтар хили, илизи чегьахъая. Илала тӀуйчи нугьру-тӀулекара баршая, дабрира чегьая. Кили, цӀерхьси кьарганра белгьеная; кадиили, шадлихъ бирехӀе. СенкӀун дила иш урши вебкӀилри – мицӀиркайуб, ветахъилри – дакӀуиуб». Илдани шадлихъ бариб.
Халал урши ил замана авлахъличив сайри. ХъайгӀи чарирухӀели, илини далай-делхъла агурби дакьиб. Живарили, чула къаравашуназивад цализи хьарбаиб: «Се бетаурлив?» Илини иб: «ХӀела узи чарухъун. Ил ара-сагъли чарухъни багьандан хӀела дудешли цӀерхьси кьарган белгьахъун». Халал урши гьимукӀиб ва хъайгӀира валли ахӀецӀеслибариб. Дуравхъунси дудешли илизи хъайгӀи ацӀахъес тиладибариб. Амма илини дудешлис жаваб бедиб: «Ну хӀед лагъван узули, чум дус ардякьи диалра, нуни хӀед ца гъайалра гӀелабяхӀ чархӀебатурра. Амма юлдашуначил барх шадлихъ барахъес хӀуни наб ца гидилра хӀегири. ХӀела мас къехӀба хьунрачил бергунси хӀела ит урши вакӀибхӀели, цӀерхьси кьарган илис белгьахъунри!» Дудешли илизи иб: «Дила урши! ХӀу мурталра набчил варх сайри, дила лебдешра хӀела саби. Нуша шаддиэс ва харидиэс гӀягӀнитира, сенкӀун хӀела узи вебкӀилри – мицӀиркайуб, ветахъилри – дакӀуиуб».
